Acts 15

Yulusalemu taonifi'mo ali'a anupa hu'a mai'naya gemae

1Henaga'amo mago vaya'mo Yutiya kotegati'mo e'a Atiyoki taonifi'mo mago konaga vaya'aife'mo ali'a apaya male'apae'mo, Mosese ke'aepa gemo'a huno'ae'mo, lapakufamo lagau'a lapateyo, huno hu'niya gemo akame osisayana Goti'a lapakufamo alino katino lapategaiye, hu'a hapa pai'nae. 2Hapa nepaige'ana Polo'e Manamasi'e'mo afite'anae'mo, ha'ao, hu'ana, lapakaemo hosu gemo nehae, hu'ana hapa paite'ana lusi kava hu'ana ge hapau'na'ae. Apakaemo Polo'agi Manamasi'agi mago Atiyoki kotega vayapatinagi hu'a lekana paite'a ali'a apaya male'naya gemo ali'a alagepa hu'a atesayafe'mo, Apa vaya'aitega'e yagai'a ne'apataya vayatama vaya'aitega'e'mo utapa hapa paiyo, hu'a hapa paite'a ali'a apate'nage'a Yulusalemu kotegamo u'nae. 3Inagi ali'a apate'nage'a Yulusalemu kotega kate'mo u'a Fonisiya kotega'e Samaliya kotega'e'mo umenitata hu'a, Asole alu nofi vaya'mogimo ai'a afe le'a Gotitegamo e'nae, hu'a hapa paimale hapa paimale hu'nage'apae'mo muki konaga vaya'mogimo lusi kava hu'a apamogaga ai'nae. 4Yulusalemu taonifi'mo u'a ava'yi hu'nage'apae'mo siosi vayanagi apa vayanagi yagai'a ne'apataya vayatama vayanagi hu'a ali'a falu fala hu'a apate'nage'anae'mo Polo'e Manamasi'e'mo Goti'a anakaeteti'mo muki hu'niya kavafe'mo ava gemo hu'ana hapa pai'na'ae. 5Hapa pai'na'age'a afite'apae'mo mago Falasi vayapati'mo apakesa afi'a fatago nehaya vaya'mogi he ti'a hu'apae'mo, Ha'ao, hu'a, Lapakufamo lagau'a lapatetesagetapaeke'mo Mosese ke'aepa gemo akame hiyo, hutapa hapa paiyo, hu'a hapa pai'nae.

6Apa vaya'e yagai'a ne'apataya vayatama vaya'mogi'e'mo ani gemo ali'a alagepa hu'a atesayafe'mo ali'a anupa hu'a mai'nae. 7Lusi kava hu'a ge huge afige hu'a mai'ne'apae'mo Pita'a he tino, konaga'nimogitapae, huno, Akeya'vilagamo Goti'a alagepa faigoko ge'amo alu nofi vaya'aife'mo ae'na hakalo hu'na hapa paisuge'a afite'apae'mo apakesa afi'a fatago hisayafe'mo lapakaepati'mo nagaemo lekana paino nate'niye. 8Goti'a muki vaya'ai apaipafi'mo ne'apakeya vekamo'a kanalene, huno huteno Auneme'amo alino lami'niya agufa kava'mo huno alino apami'niye. 9Goti'a lagaetegamo mago alu kava'mo huge alu nofi vaya'aitegamo mago alu kava'mo huge nosifa magoke aiyaya kavake'mo nehuno'ae'mo apakesa afi'a fatago nehaya kavatetike'mo apaipafati'mo aeno kalo paeno atale'niye. 10Goti'a ani kava'mo nehiya'mofe'mo na kava higetapa Goti'mo amalageka hugefe nehae. Mosese ke'aepa gemo akame hisaya kava'mo'a lusi kava huno kana hu'niya gemo hane'niye. Laginago vaya'mogi'e lagae'e'mo afa'a akame osu'none. Fiku yanageta kana hu'niya gemo alita ge'amo ne'afiya vaya'mo apamigune. 11Goti'a apakufamo alino katino apatesiya agufa kava'mo huno Ala kava ne'mo Yesu Kalaisi'a fiku laha maeno lami'niya kavateti'mo lagufamo alino katino lategaiye, huta lagesa afita fatago nehune, huno hapa pai'niye. 12Hapa pai'nige'a afite'apae'mo muki vaya'mogimo ge osu'a afa'a mai'ne'apae'mo Manamasi'e Polo'e'mo Goti'a anakaeteti'mo alu nofi vaya'aitegamo no'agaya lokiya aune kava'mo hu'niya kavafe'mo ava gemo hu'ana hapa pai'na'ae. 13Gemo hapa pai'ana hano neha'ageno'ae'mo Yemisi'a he tino hapa paino'ae'mo, Konaga'nimogitapae, huno, ge'nimo afiyo. 14Saimoni'a ago laha paino'ae'mo, Goti'a hogoteno alu nofi vayapati'mo mago vaya'mo agai'a vaya'amo mai'ne'a agi'ale'mo ali'a asaga hu'a atesayafe'mo apavale'niye. 15Ani kava hu'a Gotitegati gemo alini e'a ae'a hakalo hu'a hapa nepaiya vaya'mogi ani gemo hu'a avo'mo kae male'nae. 16Avo'mo kae male'nayana,

Ala kava ne'mo'a huno'ae'mo, Henaga'amo atagi ne'na e'na Nevini seli no'mo aino halagape vai'niya no'mo halate ali'na alagepa hu'na ki'na ategauve. Asagauno aiteno hane'niya ya'amo halate ali'na alagepa hu'na ki'na ategauve. 17Muki alu nofi vaya alu nofi vaya'mogimo vaya'nimo maigae, hu'na lekana pai'na apate'nova vaya'mogi Ala kava nefe'mo kahauya hu'a age'a avatesayafe'mo ki'na ategauve. Ala kava ne'mo'a ani kava'mo nehiya vekamo'a ani gemo huno hu'niye,
hu'a avo'mo kae male'nae. 18Goti'a akeya'vilaga aliguve, huno hu male'niya ali'ya'amo ago age'niya'mofe'mae, huno huteno, 19Yemisi'a mago'e gemo huno'ae'mo, Nagesa afuvana lagaemo alu nofi vaya'mogi Gotitegamo ai'a afe le'a ne'aya vaya'mo kanamo alita apamisunana kanale osugiye. 20Mago avo'mo kaeta atalegaune. Avo'mo kaetae'mo, Ne'ya'mo aigofe goti'apimogi ali'a ne'apamiya ne'ya'mo o'neyo. Kumai kava'mo osiyo. Lugo'afi'mo nofi aesageno falisiya afumo'a agufafati'mo kola osu'nisiya afumo o'neyo. Muki ya'mo kola'amo o'neyo, huta avo'mo kaegaune. 21Lagaemo ani Mosese ke'aepa gemo muki Yu vaya'ai taonifi'mo uteta huta mono nopi'e nopi'e'mo yatala afina'mo muki sapati afina'ae afina'ae'mo lekana paiteta alita apaya ne'malone, huno hapa pai'niye.

Avo'mo kae'a atalageno u'niya gemae

22Apa vayanagi yagai'a ne'apataya vayatama vayanagi muki siosi vayanagi hu'a ani gemo afite'apae'mo, Mago vaya'mo lekana paita apateteta Polo'e Manamasi'e'mo alita apatesunage'a Atiyoki taonifi'mo lokaeli'a ugae, hu'a hute'a Yutasi'a alu agi'amo Masamasi'e Sailasi'e'mo lekana pai'a anate'nae. Ani vekala'mo muki konaga vayapati'mo hogote vekalane. 23Ani gemo avo'mo kae'apae'mo,

Konagatimogitapae, huta, Alu nofi vayane. Atiyoki taonifi'mo mai'naya vaya'e Silisiya kotegamo mai'naya vaya'mogitapa'e'mo ge lapamamae'none. Lagaemo konagatapimogitamo apa vaya'mogita'e yagaita ne'apatona vayatama vaya'mogita'e'mo avo'mo nekaone. 24Lagaemo mago gemo afi'nonana mago lagaepati vaya'mogimo lapakaetegamo u'a hosu gemo kana hu'niya agufa gemo lapa pai'apae'mo, lapakufamo lagautetapa ke'aepa gemo akame hiyo, hu'a lapa pai'nagetapae'mo afitapa atete hu'nae. Ani agufa gemo hutapa hapa paiyo, huta osu'nonanafa apakai'apimo ani gemo hu'a lapa pai'nae. 25Lagaemo alita anupa huta mai'neta magoke laipa lagesamo ali'neta lole vekala'mo lekana paita anateteta alita anate'nonage'ana u'na'ae. Manamasi'e Polo'efe'mo lahau layamopafi'mo nelahaiya vekala'mo Ala kava ne'mo Yesu Kalaisi agi'alefe'mo vaya'mogimo hanaesayafe'mo hu'nayategamo u'na'ae. Anakae'e lekana paita anate'nona vekala'e'mo lapakaetegamo magokepi lokae'a ugae. 27Lagaemo ani lole vekala'mo Yutasi'e Sailasi'e'mo alita anate'nonanage'ana u'ana avo'mo kae'nona gemo magoke agufa gemo lapa paiga'ae. 28Goti Auneme'amo'e lagae'e'mo magoke laipa lagesamo ali'neta mago'e huno kana hu'niya gemo lapa opaita ani kava'age'mo hiyo, huta nehune. 29Nehutae'mo, Ne'ya'mo aigofe goti'apimogi ali'a ne'apamiya ne'ya'mo o'neyo. Lugo'afi'mo nofi aesageno falisiya afumo'a agufafati'mo kola osu'nisiya afumo o'neyo. Muki ya'mo kola'amo o'neyo. Kumai kava'mo osiyo, huta nehune. Ani kava'mo osisayana kanale hugiye. Maitalafiye, hu'a avo'mo kae male'nae.
30Ali'a apate'nage'apae'mo alini u'a Atiyoki taonifi'mo ava'yi hute'a eyo hu'a hu'nage'a muki vaya'mo e'a ali'a anupa hu'a mai'nae. 31Ani hapa maesiya avo'mo ali'a apami'nage'a ali'a lekana pai'a afite'apae'mo lusi kava hu'a apamogaga ai'nae. 32Yutasi'e Sailasi'e'mo Gotitegati gemo alini e'ana ae'ana hakalo hu'ana hapa nepai'a vekala'mo mai'na'a'mofe'mo muki gemo hapa paite'ana ali'ana lokiya vai'ana apate'na'ae. 33Mago'e afina'mo mai'na'age'apae'mo konaga'animogi hana pai'anae'mo, apa vaya'aife'mo ge apamamae'nona gemo utana hapa pai'ao, hu'a hana paite'ana ali'a anate'nage'ana u'na'ae. 34U'na'a'monanafa Sailasi'a Atiyoki taonifi'mo maisiyafe'mo hau'niye.

35Polo'e Manamasi'e'mo Atiyoki taonifi'mo mago afina'mo mai'na'ae. Anakae'e muki vaya'e'mo Ala kava ne'mo gemo ali'a apaya malege ae'a hakalo hu'a hapa paige hu'a mai'nae.

Polo'mo alu kate'mo u'nigeno Manamasi'a alu kate'mo u'nigeno hu'ana u'na'a gemae

36Mago afina'mo utegeno Polo'a Manamasife'mo, Halate muki taoni'afi'mo Ala kava ne'mo ge'amo aeta'a hakalo huta'a hapa pai'no'a taonifi'mo ugeta'ao. Konagati'amogi alagepa hu'a mai'nafigeta'a uta'a apakegau'ae, huno ha pai'nigeno'ae'mo, 37He, huno, La'agaemo Yoni Maki'a avalelita'a ugu'ae, huno ha pai'niye. 38Huno hu'niyana Polo'a, Ha'ao, ali'yati'amo alita'a hano osu'no'ageno Pamifiliya taonifati'mo ago la'ataleno aino atagi neno u'niya vekae, huno hu'nige'ana 39lusi kava hu'ana ge vaite'ana ali'ana fako hu'ana Manamasi'a Maki'mo avalelino sipifi'mo haino Saipalasi ani ago'nanenafi'mo uno mai'niye. 40Polo'a Sailasi'mo lekana paino ate'niye. Konaga'animogi Goti'a fiku hana maeno alagepa huno yagaino anatesiyafe'mo ali'a ayapi'mo anate'nage'ana u'na'ae. 41Polo'e Sailasi'e'mo muki Siliya kotega'e Silisiya kotega'e'mo u e'ana hu'ana siosi vaya'mo ali'ana lokiya vai'ana apatemale apatemale huli'ana u'na'ae.